Protestantischer Widerstand – Der Schmalkaldische Bund (1531/35)

Seite 2 von 6    Druckfassung    zurück zur Liste

vorheriges Dokument      nächstes Dokument

Es soll auch dieser unser cristenlicher vorstand kaiserlicher Maiestat, unserm allgenedigsten herrn, oder kaynem stand des hailigen Römischen Reichs oder sonst ymants zuwieder, sondern allayn zu erhaltung cristenlicher warhait und fridens ym hailigen Reich und deutzscher Nation und zu entschutting unbillichs gewalts für uns und unser undertann und vorwanten allayn yn gegenwehr und rettungsweise furgenommen, da unser yder, wie ober berurt, recht geben und nemen mag.

So auch ymants weiter yn diesen unsern cristlichen vorstandt zu kommen begerte und vormals nicht dorinnen begriffen, der das hailig evangelion angenommen, der sol mit unser aller wissen und willen doryn auf- und angenommen werden.

Und soll dieser cristlicher vorstand auf heut dato anfaen und sechs jar, die nagsten nochainander volgent, weren und von uns allen sembtlich und ydem in sonderhait getreulich, aufrichtig, redlich und an alles gevärde volczogen und gehalten werden.

Und obs sach were, das man mit imants also von wegen des gotlichen worts und ursachen, doraus flissend, zu krieg kommen und der vor ausgang vormelter sechs jare gantz nicht zu end bracht wurde, so soll doch nichtsdesterweniger der von allen tailen, unangesehen, das die bestimbten jare gantz vorlaufen und dieser cristlicher vorstandt sein end genommen, getreulich beharret und zu ende volfurt werden, kay tail sich dovon auzihen oder absondern.

Und mag als dan dieser cristlicher vorstand, so es den parteien gefellig, woll lenger erstreckt werden.

Sollichs alls ynd ydes gereden und vorsprechen wir vorgenante curfurst, fursten, graven und rete der stete bey unsern ehren, wirden, waren worten und guten treuen an aides stat vor uns und unser erben oddere nachkommen etc. In und mit craft dieses gegenwertigen brives war, steht, vest und unvorbruchlich zu halten, dem gentzlich nachzukommen und zu geleben, dorwider nicht au tun noch schaffen getann werden in kayn weis noch weg, alles erbarlich, getreulich und ungeverlich.

Und des allenthalben zu mehrem urkund, sicherhait und becreftigung, so haben wir, obbemelte curfurst, fursten, graven und stete, unser insigel, als wir hertzog Johans curfurst vor uns und unsern son, hertzog Johans Friderichen zu Sachssen, und hertzog Ernst vor uns und unser baide brüder, hertzog Otten und hertzog Frantzen von Luneburg, an diesen brief wissentlich tun henken und geben monntags nach dem sontag Invocavit nach Crist, unsers lieben herrn, geburt tausentfunfhundert und yn dem eynunddreissigisten jarrn.