Die Lehre einer mystischen Theologie – Theologia Deutsch (14. Jahrhundert, veröffentlicht 1516 und 1518)

Seite 4 von 5    Druckfassung    zurück zur Liste

vorheriges Dokument      nächstes Dokument

Capitulum 16

[Was do sey der alde mensche vnnd auch was do sey der newe mensche.]

Auch sal man mercken, wan man spricht von eynem menschen, das do ist alt, vnde von eynem nuwen menschen. Sich, der alt ist Adam vnd vngehorsam vnd selbheit vnd icheit vnd des gleich. Aber der nuwe mensch ist Cristus vnd gehorsam. Wanne man auch spricht von sterben vnd von vorterbenn vnd des gleich, so meynet man, das der alde mensch solde czu nicht werde, vnnd wan vnd wo das geschiet yn eynem waren, gotlichen lichte, ßo wirt der nuwe mensch wider geborn.

Man spricht auch, der mensch solde an ym selbir sterben, das ist, des menschen *icheit und selbheit soll sterben. Hie von spricht sanctus Paulus [Eph 4, 22. 24.]: ›Leget abe den alden menschen mit seynen wercken vnd czihet an eyn nuwen menschen, der nach got geschaffen vnd gebildet ist‹. Wer yn seyner selbheit vnd nach dem alden menschen lebet, der heißet vnde ist Adams kint. Er mag also ferre vnd also weßenlich dar jnne leben, er ist auch des teufels kint vnd bruder. Wer aber yn dem gehorsam vnd yn dem nuwen menschen lebet, der ist Cristus bruder vnd gotis kint.

Sich, wo der ald mensch stirbet vnd der nuwe geborn wirt, do geschiet die ander geburt. Da von Cristus sprach [10 3, 3.]: ›Ir werdet dann anderwert geborn, so kumpt yr yn das reich gotis nicht‹. Auch spricht sanctus Paulus [I Cor 15, 22.]: ›Als alle menschen yn Adam ersterben, also werden sie yn Cristo alle wider lebendigk‹. Das spricht also vil: alle, die Adam noch volgen yn dem vngehorsam, die seyn tod vnd werden nymmer lebendig den yn Cristo. Das ist dar vmmb, wanne alle die wil das der mensche Adam ist ader seyn kint, so ist er an got. Cristus spricht [Mt 12, 30.]: ›Wer nicht mit mir ist, der ist wider mich‹. Wer nu wider got ist, der ist tod vor got. Hie nach volget, das alle Adams kint tod synt vor got. Aber wer mit Cristo yn dem gehorsam ist, der ist mit got vnd lebet.

Auch ist geschriben: Sunde ist, das sich die creatur ab kert von dem schepfer. Das ist abir dissem gleich vnd ist das selb, wan wer yn vngehorsam ist, der ist yn sunden, vnde die sunde wirt nymmer gebusset noch gebessert danne mit eyme widerkeren yn den gehorsam. Vnnd alle die wile der mensche yn deme vngehorsam ist, ßo wirt die sunde nymmer gebessert, er thu, was er thu. Das merck man, wan der vngehorsam ist selber die sunde. Vnnd kumpt er wider yn den waren gehorsam, so ist eß alles gebessert vnd gebußet vnd vorgeben vnd anders nicht. Diß ist mercklich. Vnd mochte der teufel czu dem waren gehorsam kommen, er wurde eyn engel vnd alle syne sunde vnd boßheit were gebessert vnd gebusset vnd were czu mal vorgeben. Vnd mochte eyn engel czu dem vngehorsam kommen, er were als balde eyn teufel, vnd ab er anders nicht meher thete.