Capitulum 12
[Was rechter, warer, ynnerlicher frede sey, den Cristus seynen jungern zcu letzt gelaßen hat.]
Eß sprechen vil leute, sie haben nicht frede ader ruwe, sie haben vil widerwirtikeit vnd anfechtunge vnd druckes vnde lyden. Der nu diß yn der warheit wil an ßen vnd mercken: so hette der teufel auch fryde, wenne eß ym ginge nach seynem willenn vnd wolgefallen. Vnd dar vmmb so sullen wir mercken vnd war nemen des frides, den Cristus seynen jungern czu letze ließ, do er sprach [10 14, 27.]. ›Meynen fride den laß ich uch, meynen fride den geb ich uch, nicht als yn die werlt gibt‹, wanne die werlt betruget yn yren gaben.
Was frides meynet Cristus? Er meynet den jnnerlichen fride, der da durch brech vnd durch drunge durch alle anfechtunge vnd widirwertikeit, druckes, lidens, elendes ader smacheit, ader was des ist, das man dar ynne frolich vnd geduldig were, also seynen liben jungern gewest synt vnd nicht sie allein, sundern alle vßerwelten frunde gotis vnd ware nachvolger Cristi. Sich vnd nym ware, wer nu libe, fleiß vnd ernst hir czu hette, der mocht wol bekennen werden den waren, ewigen fride, der do got ist, noch mugelikeyt der creature.
Capitulum 13
[Wie der mensch den bilden etwan czu frue vrlaub gibt.]
Eß spricht der Tauler: ›Eß synt menschen yn der czite, die den bilden czu frue orlaup geben‹, ee sie die warheit do von gelößen, vnnd dar vmmb das sie sich selber lößen, so mugen sie kume ader nicht czu der warheit gereichen. Vnnd dar vmmb solde man alle czeit mit fleiße war nemen der werck gotis vnnd seyner heischunge, tribunge vnnd vormanunge des menschen.
Capitulum 14
[Von dreyen graden, die den menschen furen czu volkommenheit.]
Nv sal man wissen, das nymant erlucht mag werden, er sey denne vor gereyniget, geluttert vnnd gelediget. Auch mag nymant mit got voreyniget werden, er sey danne vor erluchte. Vnd dar vmmb seynt drey wege: zum ersten die reynigunge, czum andern die erluchtunge, czum drittin die voreynunge.
Druckfassung
zurück zur Liste
vorheriges Dokument